Gemeentebrief
OKTOBER 2026 (week 4)  

“Glo in die Here Jesus en jy sal gered word, jy en jou hele huisgesin."
Handelinge 16:31

Ons praat oor geloof, want hierdie Sondag lê 4 jong mense belydenis van geloof af in ons Maidstone wyk, staan hulle voor in die kerk en verklaar hulle dat hulle glo in Jesus Christus!
Die meeste van ons was ook daar.  En ons weet dat ons geloof in Jesus in die kern staan van ons godsdiens, ons bou ons lewens en ons huise en ons gemeentes daarop, dit vorm ons waardes, rig ons denke en lê diep in ons harte. Ons glo ook in Jesus Christus. 
Maar ons weet ook dat as 4 jongmense dit doen, dan is dit eintlik net die begin van ’n pad van geloof.  Eintlik sê hulle:  Ons glo, Here! Help ons om te glo!  Is dit nie ook maar die gebed wat ons steeds bid – maak nie saak hoe lank ons op hierdie pad is nie?  En hierdie gebed sal ons aanhou bid. Wat ons weer moet raaksien is, dat die teenoorgestelde van geloof is nie twyfel of klein geloof of sukkel-om-te-glo of jong  nuwe geloof of selfs ’n beperkte verstaan en min ken van hoe en wie God is nie. The opposite of faith is indifference… to stop caring about God and God’s things….
So net vir hierdie 4 jongmense om op te daag Sondag en daarvoor te staan, is klaar ‘n verklaring dat hulle God in hulle lewens toelaat, dat hulle ‘genoeg geloof het’ om te kom en nie met ‘n skouer-optrek wegloop nie, maar kies vir hierdie pad van geloof.
Kom ons bly saam met hulle stap en rekening hou met hierdie God wat vir ons lief is. Kom ons weier om indifferent op die kantlyn te staan, kom ons volg Jesus!

DIE VOLGENDE 2/3 MAANDE IS GROOT IN DIE GEMEENTE. DAAR IS 'N HEERLIKE KERSMARK EN 'N OPWINDENDE KERSSANGDIENS OM DIE DRAAI. MAAK NOU AL 'N PRIORITEIT IN JOU DAGBOEK OM HIERDIE BYEENKOMSTE EN ONS LAASTE PAAR EREDIENSTE VIR DIE JAAR TE KOM BYWOON! SIEN JOU DAAR!